Bu gün III turun "Neftçi" İK – "Şəki" BK oyunu baş tutub.

Prosport.Az-ın məlumatına görə, "Şəki" bu görüşə ciddi itkilərlərlə çıxıb. Belə ki, komanda legionerlərdən cəmi 3-nün xidmətindən yararlana bilib.

Buna baxmayaraq, "Sərhədçi" İdman Mərkəzində keçirilən qarşılaşmada "Şəki" təcrübəli rəqibinə ilk 2 periodda ciddi müqavimət göstərib. Hətta bəzən hesabda önə çıxıb. Bununla belə, komandalar fasiləyə "Neftçi"nin 40:35 hesablı üstünlüyü ilə yollanıb. Fasilədən sonra "Neftçi"nin amerikalı basketbolçularının ustalığı həlledici rol oynayıb. Nəticədə "Neftçi" "Şəki"yə 90:64 hesabı ilə qalib gəlib.

"Neftçi"dən amerikalı Taroce Breyk (23 xal, 2 ribaund, 2 assist) və "Şəki"dən nigeriyalı Pol Dibal (39 xal, 13 ribaund, 2 assist) ən yaxşı oyunçu olub.

Qeyd edək ki, günün digər görüşündə "Xırdalan" "Sabah"la üz-üzə gələcək. III turun əvvəlki oyunlarında "Xəzri" "Cəlilabad"ı 89:79, "NTD-İndiqo" "Gəncə"ni 94:76, "Sumqayıt" isə "Sərhədçi"ni 74:70 hesabı ilə üstələyib.