"İlk oyunda Bakıda "Xırdalan" komandasının qonağı olduq. Komandamız yeni olduğuna görə əsasən müdafiədə çox səhvlər etdik. Düşünürəm ki, buna səbəb hazırlıq oyunları oynamamağımız oldu ve nəticədə liqanın ilk oyununda məğlub olduq".

Prosport.Az-ın xəbərinə görə, bunu "Şəki" basketbol klubunun oyunçusu Nihad Tağıyev deyib. 

O, komandasının ilk 2 oyundakı məğlubiyyətləri barədə fikirlərini bildirib: "2-ci oyunda öz evimizdə "Sərhədçi" komandasını qonaq etdik. Fikrimcə, bu qarşılaşma ilk oyundan daha yaxşı alındı. Buna səbəb nisbətən də olsa bir-birimizə öyrəşməyimiz oldu. Amma yenə də deyirəm ki, müdafiədə səhvlər edirik. Komandamız yenidir, bizə bir az zaman lazımdır".

25 yaşlı oyunçu sabah keçiriləcək "Neftçi" ilə bağlı da danışıb: "Qarşıdakı oyunumuz Bakıda "Neftçi" komandası ilə olacaq. Rəqib komanda çox köklü klubdur. Hamı bu komandanın gücünə bələddir. Buna baxmayaraq, rəqibdən çəkinmirik. Var gücümüzlə mübarizə aparacağıq. İstəyirik ki, Şəkiyə – evimizə qələbə ilə dönək.

Rəqibi analiz etmişik. Ən təhlükəli oyunçuları 23 nömrəli oyunçudur. O da Kamran Məmmədovdur. Ondan başqa isə 2 xarici oyunçuları var ki, bizə baş ağrısı ola bilərlər. Bunlar 12 nömrəli (Fukuan Naylz) və 2 nömrəli (Ceyms Hotorn) amerikalı basketbolçulardır".

Qeyd edək ki, "Neftçi" – "Şəki" oyunu sabah saat 12:00-da başlayacaq. Görüş "Sərhədçi" İdman Mərkəzində keçiriləcək.