"Növbəti turda "Gəncə"yə qarşı oynayacağıq. Keçən həftə "Sabah" ilə oynamalı idik, lakin bir sıra oyunçuların xəstəliyi səbəbindən matç təxirə salındı.

Prosport.Az-ın məlumatına görə, bunu "NTD-Indigo" komandasının basketbolçusu Əkbər Məmmədov deyib.

O, "Gəncə" ilə oyundan əvvəl görüşlə bağlı fikirlərini bildirib: "Gəncə" ötən mövsüm oynadığım klubdur. Bu klubla çox şey əldə edə bildik. Ancaq indi "NTD-Indigo"nun oyunçusuyam və bütün düşüncələrim yalnız bu klubla bağlıdır. Bu mövsüm yalnız 1 oyun keçirmişik. Komandadakı atmosfer əladır. Qarşıdakı oyuna hazırlaşırıq və özümüzə güvənirik. Bəli, bizdə bütün legionerlər yenidir. Lakin "NTD-Indigo"da illər ərzində sabit bir sistem qurulub. Legionerlər komandaya çox tez uyğunlaşıb. Biz "Gəncə" ilə oyuna tam hazırıq".

Qeyd edək ki, noyabrın 9-də reallaşacaq "NTD-İndigo" – "Gəncə" görüşü Xaçmaz Olimpiya İdman Kompleksində keçiriləcək və saat 14:00-da başlayacaq.