"Turan Tovuz" Azərbaycan Premyer Liqasının Xll turunda səfərdə "Səbail"ə 1:2 hesabı ilə məğlub olub.

Prosport.Az xəbər verir ki, qərb bölgəsi təmsilçisinin baş məşqçisi Ayxan Abbasov matçdan sonra keçirilən mətbuat konfransında jurnalistlərin suallarını cavablandırıb:

– Əlbəttə, maraqlı və gərgin oyun keçəcəyini bilirdik. Ağabala Ramazanova görə çox üzgünük. Hər şeyi kənara qoysaq, sağlamlıq önəmlidir. Allah ona şəfa versin. Hər 2 komanda pis oldu. İlk hissədə oyunun taleyi həll oluna bilərdi. Çox təəssüf. Demişdim ki, fasilədən sonra ilk 5 dəqiqə diqqətli olmalıyıq. Rəqib irəli atılacaqdı. Gözlədiyimiz, qorxduğumuz epizoddan qol buraxdıq. Penalti isə maraqlı epizod idi. Ümumən, hakimlik bərbad oldu. Azərbaycanda yeni qaydalar çıxır. Eşitdiyimə görə, hər yerdə 17 qayda var, bizdə isə 18. Qapıçı ilə təkbətək çıxanda son ümid fouluna sarı vərəqə də vermək olar. Hakim dedi ki, əlinə başından dəyib. Hakimlik bərbaddır. Günü-gündən də pisləşir... 2-ci yarıda rəqib müdafiədə oturdu. Qol epizodlarından istifadə edə bilmədik, günah özümüzdə idi. İlk yarıda matçın taleyini həll etməliydik. Futbolçularımızın əzmkarlığından razıyam. Təəssüf ki, nəticə olmadı. Amma oyun baxımından üstün idik... Hakimlərin özləri qanunu bilmir. Hərə bir söz deyir. Elə qayda çıxır ki, gərək gedib hakimliyi oxuyaq. Bilmirəm, sadəcə biabırçılıqdır.

– Heç-heçə üçün nə çatmadı?
– Matçın sonu idi. "Səbail" neçə oyundur ki, belə qələbə qazanır. Qəbələdə də yaxşı müdafiə olunmuşdular. Çətin idi.

– Buraxılan qollarda özünüzü qınayırsınız?
– Səhvimiz var ki, qol buraxdıq. Taktiki səhv idi. Uzun ötürmələrdən sonra düşən toplarda uduzduq.

– Penalti epizodu haqda fikriniz necədir?
– Səlahət Ağayevin epizodunda 12 dəqiqə oyun dayandı. Dialoq gedirdi. Amma penalti epizodunda hakim tez qərar verdi. Belə epizodlarda çox da penalti vermirlər. "Sumqayıt"la matçda Martin Petkovu yıxdılar, amma penalti verilmədi. Hələ ki hakimlər bizə qarşı qərəzlidir.

– Hakimlikdən aidiyyatı qurumlara şikayət edəcəksiniz?
– Kimə şikayət edək? Hakimlikdən kiməsə şikayət edəndə nəsə olub? Təəssüf ki, hakim həmişə haqlıdır.