Yaşar Məmmədzadə adına Mingəçevir şəhər stadionu hələ də ehtiyat meydançasına qovuşmayıb.

Prosport.Az-ın xəbərinə görə, I Liqada mübarizə aparan "Mingəçevir" yalnız əsas meydançadan istifadə edir. Bu isə əsas meydançanın yüklənməsinə səbəb olur.

Stadionun tribunaları balansında olduğu Gənclər və İdman Nazirliyi tərəfindən quraşdırılıb. Lakin ehtiyat meydançanın tikintisi AFFA-nın öhdəliyinə verilib. Ötən aylarda süni örtüklü meydançanın asfalt işləri başa çatdırılsa da, sonradan bu məsələ yarımçıq saxlanılıb. Bu isə həm əsas komandanın, həm də AFFA-nın keçirdiyi aşağı liqalarda mübarizə aparan Mingəçevirin komandalarının çıxışına mənfi təsir edir. Məsələn, U-15 Liqasında mübarizə aparan "Ulduz" komandası ötən həftə "Qarabağ"a Mingəçevirdə 1:14 hesabı ilə uduzub. Komandanın autsayder olmasında əsas səbəblərdən biri də düzgün məşq meydançasının olmamasıdır.

Süni örtüklü ehtiyat meydançaya qazonun döşənməməsi ilə bağlı AFFA-ya müraciət etdik. AFFA-nın mətbuat xidmətinin rəhbəri Elnur Məmmədli məsələnin yubanmasının maliyyə ilə bağlı olduğunu bildirdi:

"Orda tikintinin dayanması maliyyə ilə bağlıdır. Bu səbəbdən işlər bir az yubanır. Çalışacağıq ki, yaxın vaxtlarda işlər davam etdirilsin və təhvil verilsin".

Qeyd edək ki, sovet vaxtı, eləcə də müstəqillik illərində o ərazidə ehtiyat meydança mövcud olub.

Səbuhi Musa