"Şamaxı"nın baş məşqçisi Vüqar Əsgərli Premyer Liqanın 34-cü turunda "Neftçi" ilə matçdan sonra mətbuat konfransında iştirak edib.

Prosport.Az xəbər verir ki, o, oyunu şərh edib:

"Neftçi" son iki oyunda qələbə qazana bilmirdi. Azarkeşlərinin inamını qaytarmaq üçün bu matça nə qədər ciddi yanaşdıqlarını bilirdik. Biz də "Neftçi"yə bu mövsüm üç oyunda uduzmuşduq. Bu gün qələbə qazanaraq, məğlubiyyətləri unutdurmaq niyyətindəydik. Qələbə qazana bilmədik. Amma futbolçularımız qələbəyə bərabər əzmkar, baxımlı oyun nümayiş etdirdilər. Onlara təşəkkür edirik. İki oyun qalıb. Nə gücümüz varsa, ortaya qoyacağıq ki Premyer Liqada qalaq".

Əsgərli növbəti turda "Qəbələ" ilə qarşılaşacaqları matçdan söz açıb: "İnanın ki, tək "Qəbələ"yə qarşı deyil, bütün oyunlar çətin keçir. Son illərdə Premyer Liqanın bu qədər maraqlı keçdiyini xatırlamıram. Hər klub xalın dəyərini bilir. "Qəbələ"nin çox güclü oyunçuları var və yaxşı futbol oynayırlar. Çətin olacağını bilirik. Amma Premyer Liqada qalmağa çalışacağıq".

Mütəxəssis çempionatda klub sayının artırılmasının tərəfdarı olduğunu sözlərinə əlavə edib: "Futbolun içində olan hər kəs istəyər ki, komandaların sayı artsın, liqamız maraqlı keçsin. Son zamanlar bu qədər maraqlı keçən liqa görməmişdik. Amma gərək qaydaları da unutmayaq, hörmətlə yanaşmalıyıq. Qaydalarda 10 komandanın olmasıdırsa, buna riayət etməliyik. Təbii ki, komanda sayının 12-ə yüksəlməsini istəyərdik ki, gənclərimiz daim oynasın. Komanda sayı artsa, bu cür futbolçularımızın sayı artacaq. Adlar çəkmək istəmirəm, amma heyətimizdə oynayan, unudulan oyunçular var idi. Gəldilər, şans qazandılar, özlərini göstərdilər. Hətta iddialı klublarımız onlara təklif göndərir. İstəyərəm ki, klub sayı çox olsun".