Amputant futbolçular arasında milli komandamız AVRO-2024-ə vəsiqə qazanıb.

Prosport.Az-ın xəbərinə görə, Avropa Amputasiya Futbolu Federasiyası tərəfindən keçirilən Millətlər Liqasının D divizionunda millimiz 2-ci yerin sahibi kimi gələn il Fransanın paytaxtı Parisdə keçiriləcək Avropa çempionatına lisenziya əldə edib.

Belə ki, Şotlandiyanın Dalqeti Bey şəhərində keçirilən yarışda meydan sahibləri və Azərbaycandan başqa, Niderland, Kosovo və Albaniya yarışıb. Komandamız ilk oyun günündə (28 oktyabr) Niderlanda 0:5 uduzsa da, daha sonra Kosovonu 6:0 darmadağın edib. 2-ci oyun günündə (29 oktyabr) isə millimiz Şotlandiyanı 5:1 və Albaniyanı 8:0 hesabı ilə darmadağın edərək yekunda 9 xalla 2-ci olub. 1-ci yerin sahibi Niderland və 3-cü yeri tutmuş Şotlandiya Azərbaycanla bərabər, Avropa çempionatına vəsiqə qazanıb.

Qeyd edək ki, Böyük Britaniyaya səfər ANAMA (Azərbaycan Respublikasının Minatəmizləmə Agentliyi) və AFFA-nın dəstəyi ilə təşkil olunub.

Onu da bildirək ki, 2017 və 2021-ci ildə keçirilmiş Avropa çempionatlarında Türkiyə millisi kuboku başı üzərinə qaldırıb.