Qadın həndbolu üzrə millimizin və "Azəryol"un rusiyalı baş məşqçisi Aleksandr Revva Şimali Makedoniya yığması ilə Avropa çempionatının seçmə mərhələ oyununa gedə bilməyib.

Bu barədə Prosport.Az-ın əldə etdiyi informasiyanı Azərbaycan Həndbol Federasiyasının İdman şöbəsinin müdiri İsgəndər Əsgərov da təsdiqləyib.

Millimizi 17:40 hesabı ilə uduzduğu görüşə "Azəryol"da da Aleksandr Revvanın köməkçisi olan Yelena Namaliyeva çıxarıb. İsgəndər Əsgərovun sözlərinə görə, Revvanın sənədləri qaydasında olmayıb:

"O, əcnəbi vətəndaş olduğuna görə müvəqqəti yaşamaq üçün Dövlət Miqrasiya Xidmətindən qırmızı rəngli şəxsiyyət vəsiqəsi almalıdır. Hazırda onun sənədləri oradadır deyə, Şimali Makedoniyaya viza üçün müraciət edə bilmədik. Səfirliyə viza üçün müraciət edəndə pasportdan əlavə mütləq şəxsiyyət vəsiqəsi də istəyirlər. Çünki onlar bilmədirlər ki, sən Azərbaycanda neyləyirsən?!

"Azəryol"la "Krivaya" komandası ilə avrokubok matçlarına gedə bildi. Çünki Rusiya vətəndaşlarına bizdəki kimi Bosniya və Herseqovinaya vizaya ehtiyac yoxdur. Şimali Makedoniyaya isə Azərbaycan vətəndaşları vizasız gedə bilir, Rusiya vətəndaşları yox".

O, "Qarabağ" komandasının rusiyalı legionerlərinin də ötən ay İspaniyada "Qranulyes" klubu ilə avrokubok matçlarına eyni səbəbdən yola düşə bilmədiklərini bildirib: "Onların da müvafiq sənədləri olmadığından, səfirliyə viza üçün müraciət edə bilmədik. Bunun Rusiya vətəndaşlarına tətbiq olan siyasi sanksiya ilə heç bir əlaqəsi yoxdur. Məsələn, 17 yaşadək qızlar millimizin və "Qarabağ"ın baş məşqçisi Sergey Kambur Belarus vətəndaşı olsa da, o, Kosovoya – Beynəlxalq Həndbol Federasiyasının turnirinə gedib. Çünki onun "miqrasiya"dan aldığı vəsiqə vardı deyə, viza ala bildi".   

Qeyd edək ki, qadın millimiz sabah Bakı İdman Sarayında İspaniya ilə qarşılaşacaq. Görüş saat 17:00-da başlayacaq.

Səbuhi Musa