"Hazırda Kiyevdə məşqlərimi keçirəm. 24-29 oktyabrda Macarıstanın paytaxtı Budapeştdə keçiriləcək dünya çempionatına hazırlaşırıq".

Bunu Prosport.Az saytına açıqlamasında karate üzrə Ukrayna millisinin azərbaycanlı üzvü Rizvan Talıbov deyib.

O bu ay İrlandiyanın paytaxtı Dublində keçirilmiş mövsümün son Premyer Liqa yarışında qalib olmaqla "Best of the Best" nominasiyasında "Qrand Viner" (Grand Winner) mükafatına yiyələnib. Baxmayaraq ki, bu yarışadək Rizvandan başqa, Seneqal əsilli Babakar Sek (İspaniya), Matteo Avantsini (İtaliya), Fatih Şən (Türkiyə) və Rob Timermans (Kurasao) "Qrand Viner" tituluna iddia edirdi. Lakin Rizvanın turnirin finalında qalib gəlməsi titulun əldə olunmasında böyük rol oynayıb:

"Xoşbəxtəm ki, finala çıxdım. Ancaq bilmirdim ki, mən "Qrand Viner" olmuşam. Finaldan qabaq mənə bunu bildirdilər. Ancaq bunu unutmaq istəyirdim. Çünki finalda arxayınçılıq olmasını istəmirdim. "Qrand Viner" böyük tituldur. Çili idmançısı olan Rodriqo Roxasla final döyüşüm gərgin keçdi. Gah rəqibim, gah da mən üstün tərəf olduq. Hələ məndə belə bir şey olmamışdı. Bu səbəbdən qızıl medal mənə daha şirin gəldi. Həm də ardıcıl 2-ci dəfə Premyer Liqada qızıl medal qazanırdım. İyunda Yaponiyanın Fukuoka şəhərində keçirilmiş Premyer Liqa yarışında da Babakar Sek Sakonu məğlub edib çempion olmuşdum. Premyer Liqada ümumilikdə 4-cü final və 3-cü qızıl medalım idi".

Həmçinin 2017, 2019 və 2022-ci illərdə bu titula yiyələnmiş Azərbaycanın Ukrayna əsilli karateçisi İrina Zaretskaya da 4-cü dəfə bu titulu qazana bilərdi. Baxmayaraq ki, o, İrlandiyada qızıl medal qazandı, bu onun "Qrand Viner" tituluna yiyələnmək üçün əsas rəqibi Elena Çuiritsiyə çatmasına imkan vermədi.

Qeyd edək ki, Rizvan Talıbovdan (+84 kq) başqa, Nisiyama Kakeru (Yaponiya, kata), Hiromu Hasimoto (Yaponiya, 60 kq), Abdel Rəhman Almasatfa (İordaniya, 67 kq), Kventin Maauden (Belçika, 75 kq) və Məhəmməd Əl-Cəfəri (İordaniya, 84 kq) "Qrand Viner" olub. Qadınlarda isə Hikaru Ono (Yaponiya, kata), Yorqelis Salasar (Venesuela, 50 kq), Anjelika Terlyuqa (Ukrayna, 55 kq), Reem Xamis (Almaniya, 61 kq), Elena Çuiritsi (İsveçrə, 68 kq) və Ayumi Uekusa (Yaponiya, +68 kq) bu titula yiyələnib.

Azərbaycan karateçilərindən bu titula cəmi 3 idmançı yiyələnib. Bunlar Rafael Ağayev (75 kq), İrina Zaretskaya (68 kq) və Əminağa Quliyevdir. Rafael Ağayev 2, İrina Zaretskaya 3, Əminağa Quliyev (60 kq) isə 1 dəfə bu titula yiyələnib. Beləliklə, Rizvan Talıbov milliyyətcə azərbaycanlı olan karateçilərdən 3-cüsü olub ki, bi titula sahib çıxıb.