İki boksçumuz Daşkənddə keçirilən dünya çempionatında yarımfinala yüksəlib.

Prosport.Az xəbər verir ki, yığmamızın üzvlərindən Alfonso Dominqes (86 kq) və Məhəmməd Abdullayev (+92 kq) 1/4 final döyüşünü qələbə ilə başa vurublar.

Alfonso Dominqes yarımfinala gedən yolda Şahcahan Abdullayevlə (Özbəkistan) döyüşüb. Dünya çempionumuz 5:2 hesablı qələbə sayəsində ardıcıl ikinci dəfə mundialın yarımfinal mərhələsinə yüksəlib. Təmsilçimiz növbəti görüşündə Georgi Kuşitaşvili (Gürcüstan) ilə gücünü sınayacaq.

Alfonso Dominqesin uğurunu Məhəmməd Abdullayev (+92 kq) də davam etdirib. 1/4 finalda Nikoloz Beqadze (Gürcüstan) ilə qarşılaşan dünya çempionatının mükafatçısı 5:0 hesabı ilə qalib gəlib. Abdullayev də ardıcıl 2-ci dəfə mundialın yarımfinalında iştirak hüququ əldə edib. Boksçumuz bu mərhələdə həmyerlisi – kubalı Fernando Lopes Arsola ilə üz-üzə gələcək.

Hər iki boksçumuz yarımfinala vəsiqə əldə etməklə, özləri üçün ən azı bürünc medalı da təmin ediblər.

Qeyd edək ki, yarımfinal döyüşləri mayın 12-də olacaq.