“Neftçi” idman klubunun icraçı direktoru Fərəc Əliyev Bakıda Estoniyanın "Parnu" komandasına qarşı basketbol üzrə Avropa Kubokunun təsnifat mərhələsinin ilk oyununda qazanılan qələbəni (80:67) şərh edib.

F.Əliyev Prosport.Az-a açıqlamasında oyunun çox gərgin keçdiyini qeyd edib:

"Keçən mövsümlə müqayisədə komandamızda çox dəyişikliklər var. Bu, yeni heyətlə keçirdiyimiz ilk oyun idi. Bizi hələ ikinci görüş də gözləyir. Buna görə də ümumi nəticə barədə danışmaq üçün hələ tezdir. Qarşıda bizi çətin səfər oyunu gözləyir və ümid edirəm ki, oradan qələbə ilə qayıdacağıq.

Biz hər oyuna qələbə üçün çıxırıq. Keçən mövsüm qrupda ikinci yeri tutmuşduq. Bu il isə reqlament dəyişib. Ötən il qrupda 4 komanda var idisə, bu il artıq 6 komanda mübarizə aparır. Hər oyuna ciddi hazırlaşmalı və qələbə qazanmağa hazır olmalıyıq. Ümid edirəm ki, bu mövsüm yaxşı nəticə əldə edəcəyik. “Neftçi” iştirak etdiyi hər turnirdə maksimum nəticə qazanmaq istəyir. İstər avrokuboklar olsun, istərsə də ABL. Biz yalnız qələbəyə köklənirik”, – deyə Əliyev bildirib.