Bolqarıstanın paytaxtı Sofiyada minifutbol üzrə 2023/2024 avrokubok mövsümünün püşkatma mərasimi keçirilib.

Prosport.Az xəbər verir ki, tədbirdə Azərbaycan klublarının da rəqibləri müəyyənləşib.

Çempionlar Liqasında mübarizə aparacaq təmsilçilərimizdən son ölkə çempionu "Birbaşa" C qrupunda "Prestij" (Albaniya), "Volta" (Moldova) və "Maqufana" (Yunanıstan) ilə qarşılaşacaq. "Zirə" isə iki 3-lü qrupdan birində yer alıb. Gümüş medalçımız F qrupunda "Terra Trak" (Bolqarıstan) və "Andezit" (Ukrayna) ilə münasibətləri aydınlaşdıracaq.

Bürünc medalçı "Zəngəzur"un da Avropa Kubokundakı rəqibləri bəlli olub. A qrupunda rəqiblər "Qalaktiko" (Bolqarıstan), T.M.T. (Yunanıstan) və "Veska" (Çexiya) klublarıdır.

Qeyd edək ki, Çempionlar Liqasının matçları 6-9 sentyabrda Rumıniyanın Orada şəhərində keçiriləcək. Avropa Kuboku isə 13-17 sentyabrda Bolqarıstanın Burqas şəhərində baş tutacaq.