Misli Premyer Liqasının VI turunda “Qarabağ” öz meydanında “Şəfa”nı 1:0 hesabı ilə məğlub edib.

Görüşdən sonra “Şəfa”nın futbolçusu David Pop Prosport.Az-a açıqlama verib.

– Matç haqqında fikirləriniz nələrdir?

– Oyunun çətin keçəcəyini əvvəlcədən bilirdik. “Qarabağ” uzun illərdir Avropada mübarizə aparan güclü komandadır. Buna görə də bizim üçün asan olmayacağı bəlli idi. Buna baxmayaraq, düşünürəm ki, meydanda yaxşı mübarizə apardıq.

– Penalti epizodunda hakimin qərarını necə qiymətləndirirsiniz?

– Həmin vaxt isinmə hərəkətləri edirdim və epizodu birbaşa görə bilmədim. Lakin mənə deyilənlərə əsasən, top əvvəlcə ayağa toxunub, daha sonra ələ dəyib. Məncə, belə vəziyyətdə penalti təyin edilməməli idi. Amma son qərarı hakim verir. İnanıram ki, hakimlər hər zaman ən düzgün qərarı çıxarmağa çalışırlar.

– Penaltiyə qədər komandanız yaxşı təsir bağışlayırdı. Həmin epizoddan sonra motivasiyanın azaldığını düşünürsünüz?

– Bəli, xal qazanmaq üçün imkanlarımız var idi. Penaltiyə qədər sona qədər mübarizə aparır və döyüşürdük. Müasir futbolda ən kiçik səhv belə cəzalandırıla bilər. “Qarabağ” ümumilikdə oyunda daha üstün idi. Buna baxmayaraq, biz də qarşılaşmanın sonuna qədər mübarizəni davam etdirdik.

– “Şəfa” milli fasiləyə qədər 6 oyunda cəmi bir qələbə qazanıb. Fasilədən sonra daha çox xal toplamaq mümkündür?

– 18 mümkün xaldan cəmi 3 xal toplamışıq. Bu, həqiqətən də azdır və vəziyyətin fərqindəyik. Amma nəzərə almaq lazımdır ki, ardıcıl olaraq çempionatın ən güclü komandaları ilə qarşılaşmışıq. İnanıram ki, milli fasilədən sonra daha çox xal qazana bilərik.