UEFA Avropa Liqasının pley-off mərhələsinin cavab oyunu olan "Qarabağ" – "Olimpiya" (Sloveniya) matçından sonra qarşılaşmanın keçirildiyi Tofiq Bəhramov adına Respublika stadionunda jurnalistlərə, eləcə də oradan keçən futbolçulara qarşı hörmətsizlik olub.

Prosport.Az-ın xəbərinə görə, quraşdırılmış "miks zona" "su altında qalıb".

Belə ki, quraşdırılmış kondisionerin suları futbolçuların və jurnalistlərin dayandığı zonaya tökülüb. Görüntü çəkilərkən "Olimpiya"nın portuqaliyalı baş məşqçisi Joau Hekes jurnalistlərə müsahibə verirmiş... Və o su o ərazidən keçən hamının – futbolçunun da, məşqçinin də, həkimin də, masajçının və s. başına tökülür. Əldə etdiyimiz məlumatlara görə, yenicə təmirdən çıxmış bu stadionda problemlər yetərincədir. Məsələləri tədricən işıqlandıracağıq.

Hələ ki bu məsələ ilə bağlı Tofiq Bəhramov adına Respublika stadionunun yeni direktoru Tələt Məmmədovun fikirlərini öyrəndik. Bu məsələdən xəbəri olmadığını bildirən T.Məmmədov bunun "qlobal problem" olmadığını bildirməyi özünə sığışdırdı: "Kondisionerdən su axıb?! Bu, qlobal problem olsaydı, bundan xəbərim olardı".

"Jurnalistin üzərinə su axması qlobal problem deyil?" sualımıza isə direktor belə cavab verdi: "Aradan qaldırarıq".

Qeyd edək ki, Tələt Məmmədov iyulda bu vəzifədə Babək Həmidovu əvəzləyib. O, bura gələnədək "Neftçi” PFK-da İnfrastruktur və Nəqliyyat Departamentinin rəisi vəzifəsində çalışıb. Onun Gənclər və İdman Nazirliyinin İdman şöbəsinin müdiri Elnur Məmmədovun kadrı olduğu bəllidir. Tələt Məmmədov 2016-cı ilin fevralında "Neftçi"nin ovaxtkı icraçı direktoru Elnur Məmmədovun vaxtında işə götürülüb.

Səbuhi Musa