Azərbaycanda ilk dəfə təşkil olunan çimərlik polosu üzrə Dünya Kubokunun mükafatlandırma mərasimi keçirilib.

Prosport.Az xəbər verir ki, yarışda iştirak edən 4 komandaya müxtəlif mükafatlar təqdim olunub.

Turnirin qalibi olan Azərbaycanın "Elit" komandası qızıl, finalda 4:6 hesabı ilə məğlub olan İsveçrə təmsilçisi "Sent Morits" gümüş, 3-cü yeri tutan Böyük Britaniyanın "Red Star" komandası isə bürünc medalla təltif edilib. "Red Star"a 5:9 uduzaraq 4-cü pillədə qərarlaşan Rusiyanın "Moskva" komandasına isə iştirak medalları təqdim olunub.

Mükafatları Azərbaycan Respublikası Atçılıq Federasiyasının (ARAF) prezidenti Elçin Quliyev, gənclər və idman naziri Fərid Qayıbov və “World Polo” şirkətinin italyan əsilli isveçrəli prezidenti Reto Qaudentsi təqdim edib.

Turnirin hakimlərinə "Doğru oyun" medalları verilib. Rusiya təmsilçisindən İvan Romanovski ən yaxşı komanda rəhbəri, "Elit"in italyan əsilli argentinalı üzvü Raul Laplaçette isə ən yaxşı oyunçu seçilib.

Yarışın qalibi "Elit" komandasına isə kubok təqdim olunub.