"Kəpəz" növbəti əcnəbi transferini həyata keçirib.

Prosport.Az-ın xəbərinə görə, Gəncə klubu kosovolu David Domconi (Domgjoni) ilə 1 illik müqavilə bağlayacaq.

29 yaşlı futbolçu mərkəz müdafiəçisidir və artıq Gəncədə tibbi testdən uğurla keçib. Kosovo Azərbaycan tərəfindən tanınmasa da, onun 18 fevral 2014-cü ildən Albaniya vətəndaşlığının da olması bu transferi asanlaşdırıb.

Onun transferi "Sabah"la ilk turda penaltiyə səbəb olan portuqaliyalı stopper Dioqu Verdaşkanın yerinə nəzərdə tutulub. 25 mayda 2028-ci ilədək müqaviləsinin müddəti uzadılmış "Portu"nun yetirməsi olan Verdaşka ilə yolların ya bu ay, ya da qışda ayrılacağı gözlənilir.

Qeyd edək ki, David Domconi Albaniyada "Tirana", "Kastrioti", "Laçi", "Partizani", ölkəsi Kosovoda "Liria", Türkiyədə "Menemenspor", "Manisa", İsveçrədə "Lutsern", Rumıniyada "Bruk-Bet Termalika", Qazaxıstanda "Tobol" kimi klublarda oynayıb. Onun son klubu İsraildə Qüds "Hapoel"i olub. Domconi Albaniyanın 17 və 19 yaşadək millilərində, eləcə də Kosovonun əsas yığmasında oyuna çıxıb.

Xatırladaq ki, Azər Məmmədovun baş məşqçisi olduğu "Kəpəz" daha əvvəl legionerlərdən portuqaliyalı qapıçı Rojeriu, qanalı hücumçu Asuma Abubakar, zambiyalı sağ cinah vingeri Kenet Kalunqa, moldovalı hücumameyilli yarımmüdafiəçi Viktor Stıne, nigeriyalı sağ cinah vingeri Benito və belçikalı mərkəz yarımmüdafiəçisi Desmon Akva ilə müqavilə imzalayıb.