25 oktyabr – 5 noyabr tarixlərində Men adalarının Duqlas şəhərində FIDE-nin təşkilatçılığı keçiriləcək şahmat üzrə III "Grand Swiss" turnirində Azərbaycanın 3 şahmatçısının iştirakı demək olar ki, dəqiqləşib.

Prosport.Az-ın xəbərinə görə, şahmat tacına gedən yol üçün Namizədlər Turnirinə 2 vəsiqə qazandıran bu mötəbər turnirdə Bakıda keçirilmiş Dünya Kubokunun yarımfinalçısı Nicat Abbasov, eləcə də Rauf Məmmədov və Vasif Durarbəylinin iştirakı təsdiqlənib.

Teymur Rəcəbov son müsahibəsində bu turnirdə iştirak etməyəcəyini bildirib. Şəhriyar Məmmədyarov da hələ ki burada iştirakını təsdiqləməyib.

İyulun 25-də FIDE 11 turdan ibarət olan yarışda 100 iştirakçının adını açıqlayıb. Lakin bildirilib ki, sentyabradək yekun say 114 şahmatçıdan ibarət olacaq. Avqustun 20-dək olan məlumata görə, son say hələ ki 104-dür.

Qeyd edək ki, bu yarışın qalibi və 2-cisi şahmat tacına Namizədlər Turnirinə vəsiqə qazandırır.