Beynəlxalq Şahmat Federasiyası (FIDE) avqust ayı üçün yenilənmiş reytinqini açıqlayıb.

Prosport.Az xəbər verir ki, Azərbaycan şahmatçılarından ən yüksək pillədə Şəhriyar Məmmədyarov yer alıb. 41 yaşlı idmançı ötən ayla müqaviləsə 1 pillə irəliləyib. 2723 xalı olan qrossmeyster 22-ci pillədə qərarlaşıb.

Teymur Rəcəbov 38-ci yerdədır. Onun aktivində 2689 xal var. 10 pillə irəliləyən Aydın Süleymanlı 47-ci yerdədir (2668).

Rauf Məmmədov hazırda 83-cü yerdədir (2639). O, mövqeyini bir pillə yaxşılaşdırıb. 20 pillə geriləyən Məhəmməd Muradlı isə 98-ci yerdədir (2630).

Qeyd edək ki, reytinq cədvəlinə norveçli Maqnus Karlsen başçılıq edir (2823). Fabiano Karuana (ABŞ) 2-ci (2792), Hikaru Nakamura (ABŞ) 3-cüdür (2792).

Qadınların reytinqində Azərbaycan şahmatçısı Ülviyyə Fətəliyeva 25-ci yerdədir (2440). Gövhər Beydullayeva 53-cü (2392), Xanım Balacayeva 81-ci (2356), Günay Məmmədzadə isə 89-cu (2351) sırada qərarlaşıb.

Qadınların reytinqində Çinli Hou Yifan (2596) yenə də liderlik edir. Onun həmyerliləri Lei Tingjie (2561) və Ju Wenjun (2553) müvafiq olaraq 2-ci və 3-cü yerləri tutublar.