UEFA Avropa Liqasının II təsnifat mərhələsinin cavab qarşılaşması çərçivəsində səfərdə Bolqarıstanın ÇSKA klubuna penaltilər seriyasında məğlub olaraq mübarizəni dayandıran “Qarabağ”ın baş məşqçisi Qurban Qurbanov matçdan sonra keçirilən mətbuat konfransında jurnalistlərin suallarını cavablandırıb.
Prosport.Az xəbər verir ki, təcrübəli mütəxəssis komandasının nümayiş etdirdiyi xarakterdən razı qaldığını bildirib.
– İlk növbədə rəqibi təbrik edirəm. Yaxşı qarşılaşma alındı. Bakıda da, burada da vurğulamışdım ki, bərabər gücə malik 2 kollektiv qarşılaşır və yekun hesab da bunu təsdiqlədi. Əlavə şərhə ehtiyac yoxdur. Futbolçularım meydanda böyük əzm göstərdilər və onların mübarizəsindən tam razı qaldım. İnşallah, növbəti matçlara hazırlaşacağıq. Sadəcə, 120 dəqiqəlik mübarizə bir qədər ağır oldu. Heyətin mövcud fiziki durumu əlavə vaxt oynamaq üçün hələ tam kifayət etmirdi, amma hər bir halda, azarkeşlər üçün olduqca maraqlı bir matç alındı.
– “Qarabağ” 58% topa sahib olaraq üstün oyun nümayiş etdirsə də, bunu qola çevirə bilmədi. Bunun əsas səbəbi nə idi?
– Müdafiədə çox yaxşı təşkilatlanmış rəqiblə üz-üzə gəldik. Digər tərəfdən, epizodlarda daha dəqiq oynamalı idik. Oyunçular yorğun olanda və ya tam hazır olmadıqda belə texniki səhvlər qaçılmaz olur. Mənim üçün vacib olan futbolçuların sonadək mübarizə aparması idi. İnanıram ki, növbəti görüşlərdə bu çatışmazlıqlar tədricən aradan qalxacaq. Komandada müəyyən yeniliklər də var. Çox kompakt müdafiə olunan kollektivlərə qarşı imkanlarımızın sayını daha da artırmalıyıq ki, qol şansı yarada bilək. Bəzən elə oyunlar olur ki, rəqibin müdafiə səddini yaramaq mümkün olmur.
– ÇSKA-nın heyətində xüsusi yaddaqalan bir futbolçu oldu?
– Xüsusi olaraq kimisə fərqləndirmək düzgün olmaz. Rəqibin heyətində kifayət qədər təcrübəli və keyfiyyətli futbolçular var. Ümumilikdə bir-birini yaxşı tamamlayan bütöv bir kollektivə qarşı oynayırdıq.
– Rəqibin ilk matçla müqayisədə oyun sistemini dəyişməməsi sizin üçün sürpriz olmadı ki? Əvəzlənən hücumçunuz Zakaria Savonun zədəsi nə dərəcədə ciddidir?
– Açığı, rəqibin öz sistemini dəyişməyəcəyini və daha çox müdafiəyəmeyilli oynayacağını gözləyirdim. Savoya gəlincə, matç çox gərgin və ikili mübarizələrlə yadda qaldı. Yorğunluq da öz sözünü deyirdi və əlavə vaxtda zədələndi. Futbolçular hələ 120 dəqiqəlik ağır yükü daşımağa tam hazır deyil. Savo sürətli oyuna üstünlük verən və çox güc sərf edən futbolçudur, belə oyunçularda zədələnmə riski həmişə yüksək olur. O da belə bir zədə ilə üzləşdi.