UEFA Konfrans Liqasının II təsnifat mərhələsinin cavab görüşü çərçivəsində Estoniyanın “Payde” klubunu qəbul edən və 1:1 hesabı ilə heç-heçə edərək ümumi nəticədə (1:2) mübarizəni dayandıran “Zirə”nin baş məşqçisi Rəşad Sadıqov matçdan sonra təşkil olunan mətbuat konfransında fikirlərini bölüşüb.

Prosport.Az xəbər verir ki, mütəxəssis matçın gedişatını və qaçırılan imkanları dəyərləndirib:

“Təbii ki, belə bir matçdan sonra uzun-uzadı danışmaq bizim üçün çox çətindir. Olduqca məyusedici bir məğlubiyyət oldu və mərhələni keçə bilmədik. Əslində, hər şey göz önündə idi. Erkən vurduğumuz qol və ardından yaradılan çoxsaylı imkanlar var idi. Bəlkə də 3–4 oyuna sığacaq qədər real qol epizodları yaratdıq, amma onları dəyərləndirə bilmədik. Burada yalnız “istifadə edə bilmədik” demək də olmur. Toplar dirəkdən qayıtdı, qapıçı və müdafiəçilər inanılmaz seyvlər etdilər. Sanki top qapıdan keçmək istəmirdi. Futbolda belə imkanları boşa verəndə çox vaxt məğlubiyyət qaçılmaz olur. Bugünkü oyunun sonu da belə alındı. Artıq gedişat onu göstərirdi ki, qol vura bilməyəcəyik və rəqib mərhələni keçəcək. Onları təbrik edirəm və növbəti raundda uğurlar arzulayıram. Çox məyusuq. Hər iki oyuna baxsaq, böyük üstünlük və yaratdığımız epizodlara görə mərhələni keçməyə layiq tərəf biz idik. Təəssüf ki, bu üstünlüyü hesaba əks etdirə bilmədik”.