UEFA və quruma üzv olan 55 milli assosiasiya FIFA-nın dünya çempionatı və digər turnirlərdəki mülkiyyət paylarını özəl investorlara vermək planına qarşı birgə bəyanat yayıb.

Prosport.Az xəbər verir ki, UEFA-nın rəsmi saytında yayımlanan bəyanatda təklifin yekdilliklə və qəti şəkildə rədd edildiyi bildirilib.

“Dünya çempionatına investisiya məhsulu kimi yanaşmaq olmaz. Bu turnir futbolun ən böyük idman irslərindən biridir. O, nəsillər boyu futbolçular, milli komandalar və azarkeşlər tərəfindən formalaşdırılıb. Dünya çempionatının heç bir hissəsi özəl investorlara verilməməlidir. Dünya çempionatı satılmır”, – deyə bəyanatda vurğulanıb.

UEFA FIFA-nın bu təşəbbüsü futbol ictimaiyyəti ilə məsləhətləşmədən hazırlamasını məsuliyyətsiz addım kimi qiymətləndirib.

Bəyanatda qeyd olunub ki, özəl investorların FIFA turnirlərində pay sahibi olması beynəlxalq təqvimin, yarışların formatının və futbolun gələcəyi ilə bağlı qərarların idman prinsipləri deyil, maliyyə maraqları əsasında qəbul edilməsinə səbəb ola bilər.

“Belə modelin dünya futbolunda yeri yoxdur”, – sənəddə bildirilib.

UEFA və milli assosiasiyalar bəyan ediblər ki, sözügedən təklif tamamilə geri götürülməyənədək Avropa yığmaları FIFA-nın heç bir yarışında iştirak etməyəcək.

“FIFA bu planlardan birdəfəlik imtina etməli və gələcəkdə yarışların özəl mülkiyyətə açılmayacağına dair hüquqi təminat verməlidir. Əks halda UEFA-nın heç bir milli komandası FIFA yarışlarında iştirak etməyəcək”, – bəyanatda qeyd olunub.

Sonda UEFA dünya çempionatının futbola məxsus olduğunu vurğulayaraq, Avropanın mövqeyi dəyişmədiyi müddətdə bu turnirin satışa çıxarılmayacağını bəyan edib.