Bolqarıstanın paytaxtı Sofiyada keçirilən taekvondo üzrə klublararası Avropa çempionatı başa çatıb.

Apasport.az xəbər verir ki, 156 komandanın 2 mindən çox idmançısının qatıldığı yarışın son günündə Azərbaycanın "Gilan" İdman Klubunun üzvləri 2 qızıl və 1 bürünc, Dövlət Gömrük Komitəsinin İdman-Sağlamlıq Mərkəzinin təmsilçisi 1 bürünc medal qazanıb.

"Gilan"ın heyətində dağıstanlı legioner Həşim Məmmədov (58 kq) çempion tituluna yiyələnib. O, finalda moldovalı Sergey Uskovla döyüşüb. Gərgin keçən görüş taekvondoçumuzun qələbəsi ilə başa çatıb və Həşim fəxri kürsünün ən yüksək pilləsinə qalxıb.

Onun uğurunu Minayə Əkbərova (46 kq) da təkrarlayıb. Əkbərova həlledici görüşdə lesotolu Mişell Taunu sınağa çəkib. Bu döyüşü də aktivinə yazan Minayə fəxri kürsünün ən yüksək pilləsinə qalxıb.

“Gilan”ın digər taekvondoçusu Yaşar Məmmədli (68 kq) bürünc medalla kifayətlənib. O, yarımfinalda isveçli Ali Alianla üz-üzə gəlib və məğlub olaraq, bürünc medala yiyələnib.

Dövlət Gömrük Komitəsinin İdman-Sağlamlıq Mərkəzinin taekvondoçusu Nicat İsmayılzadə (80 kq) də fəxri kürsüyə qalxıb. İsmayılzadə yarımfinalda Farzad Mansuriyə (RTA) uduzduğundan 3-cü yeri tutub.

Beləliklə, Azərbaycan klubları Avropa çempionatını 6 medalla bitirib. “Gilan” 2 qızıl və 2 bürünc medalla komanda hesabında 156 klub sırasında 3-cü yeri tutub.

Qeyd edək ki, daha öncə “Gilan”dan Taleh Süleymanov (87 kq) da 3-cü yeri tutub. Gənclərin yarışında isə “Alpman” Taekvondo Klubunun üzvü Səlimə Quliyeva (42 kq) gümüş medala yiyələnib.