İsveçrənin “Bazel” klubu Azərbaycan çempionu “Sabah”dan transfer olunan Aaron Maludanın keçidini rəsmiləşdirib.

Prosport.Az xəbər verir ki, 20 yaşlı fransalı vinger yeni klubu ilə 2030-cu ilin yayına qədər nəzərdə tutulan 4 illik müqavilə imzalayıb. O, “Bazel”də 17 nömrəli forma ilə çıxış edəcək.

Maluda keçidi barədə bunları deyib: “‘Bazel’i zəngin ənənələrə və böyük azarkeş kütləsi olan bir klub kimi tanıyıram. Klubun hədəfləri şəxsi məqsədlərimlə tam üst-üstə düşür. Baş məşqçi və idman rəhbərliyi ilə çox uğurlu danışıqlarımız oldu. Qarşıma aydın bir fəaliyyət planı qoyuldu və onların məni komandada görməyi nə qədər çox istədiklərini hiss etdim. Bu yanaşma ilk andan böyük təəssürat yaratdı və inam qazandırdı. Tezliklə qırmızı-göy formada meydana çıxmağı səbirsizliklə gözləyirəm”.

Klubun texniki direktoru Andreas Herrmann transferi dəyərləndirib:

“Hücum xəttimizi fəndgir, cəld və çoxşaxəli bir vinger ilə gücləndiririk. Aaron Maluda sürəti, yaradıcılığı və rəngarəng hücum oyunu ilə komandamıza dərhal öz töhfəsini verəcək”.