UEFA Avropa Liqasının II təsnifat mərhələsinin cavab oyunu çərçivəsində səfərdə Bolqarıstanın “ÇSKA Sofiya” klubu ilə qarşılaşacaq “Qarabağ”ın baş məşqçisi Qurban Qurbanov matçdan əvvəl keçirilən mətbuat konfransında jurnalistlərin suallarını cavablandırıb.
Prosport.Az xəbər verir ki, təcrübəli mütəxəssis ilk növbədə cavab qarşılaşmasının əhəmiyyətini və rəqibin iddialı yanaşmasını vurğulayıb.
— Hər iki komanda üçün çox vacib oyundur. İlk görüşün nəticəsi bərabərlik olub və cavab matçında hər ikimiz qalib gəlmək istəyirik. Rəqibin açıqlamalarından da görünür ki, çox iddialı və həvəslidirlər. Bu da məsuliyyətimizi bir qədər də artırır. Meydanda eyni səviyyəli 2 komanda olacaq və şanslar bərabərdir. Hər bir halda inanıram ki, azarkeşlər maraqlı və baxımlı futbol izləyəcəklər. Biz də öz növbəmizdə ən yaxşı oyunlarımızdan birini nümayiş etdirməyə çalışacağıq.
— Bakıdakı ilk oyundan fərqli olaraq nə dəyişəcək, komandanın Avropa təcrübəsindən necə istifadə etməyi planlaşdırırsınız?
— Mərhələ keçmək istəyiriksə, mütləq Bakıdakı oyundan daha yaxşı performans göstərməliyik. Kəskin bir dəyişiklikdən söz gedə bilməz, amma oyun keyfiyyətimizi artırmağımız şərtdir, çünki matçın gedişində sistemdə dəyişikliklər və rotasiyalar etməyi bacaran rəqiblə qarşılaşırıq. Bizim ən güclü silahımız öz oyunumuzu daha da yaxşılaşdırmaqdır. Təcrübəyə gəldikdə isə, bəli, həm ümumi komandanın, həm də mənim təcrübəm var, lakin qarşı tərəfi də qiymətləndirmək lazımdır. Rəqibin baş məşqçisi zamanında yaxşı futbolçu olub, indi də keyfiyyətli mütəxəssisdir. Hansı detallardan istifadə edəcəyimizi deməyəcəyəm, amma belə oyunlarda daha soyuqqanlı və səliqəli olmalıyıq. Qarşımızda çox istəkli rəqib var və bu bizi sevindirir. Aqressiv azarkeşlər qarşısında daha soyuqqanlı və cəsarətli olacağımıza əminəm.
— Ötən mövsümün əsas qol silahları Kamilo Duran və Leandro Andrade komandanı tərk etdi. İlk oyunun 0:0 bitdiyini nəzərə alsaq, hücum xəttində onları necə əvəzləməyi planlaşdırırsınız?
— Bəli, kollektivə tam uyğunlaşan və oyunumuzun keyfiyyətini artıran iki mühüm futbolçumuzla yollarımızı ayırdıq. Onlar özünəinamı yüksək olan oyunçular idi, amma bu gün “onlar olsaydı nə edərdik” deyə düşünmürəm, hər ikisinə yeni klublarında uğurlar arzulayıram. İndiki hücum xəttimizə gəlincə, yeni transfer olunan futbolçularımız çox işgüzardır və özlərini ən yaxşı tərəfdən göstərməyə çalışırlar. Mən onları potensiallarına inanaraq komandaya dəvət etmişəm. Üslubca bir qədər fərqli olsalar da, maraqlı oyun manevrlərinə sahibdirlər. İnanıram ki, gedənlərin yoxluğunu hiss etdirməyəcək və nəticə üçün sonadək mübarizə aparacaqlar.
— İki il əvvəl “Ludoqorets”ə 7 qol vurmuşdunuz. İndiki oyunda da analoji nəticə gözləmək olar?
— Biz ümumiyyətlə o barədə düşünmürük. Belə böyükhesablı nəticələr nadir hallarda baş verir. Üstəlik, qarşımızdakı tamamilə fərqli komandadır. “İki il əvvəl 7 qol vurmuşduqsa, indi də rahat qalib gələcəyik” düşüncəsi ilə meydana çıxmaq olmaz. Bakıda bu komandanın gücünü bir daha gördük. Bu gün futbol elə bir səviyyəyə çatıb ki, hər an istənilən nəticə qeydə alına bilər. Bizim üçün fərqi yoxdur — 1 top fərqi olsun, 2 top fərqi olsun, əsas olan qələbə üçün düzgün oyun planı qurmaqdır. Bu komandaya qarşı səhlənkarlığa yol vermək olmaz. Keçmiş nəticələri unutmuşuq və sabaha lazım olan nəticəni əldə etmək üçün bura gəlmişik.