Finlandiyanın KuPS klubunun futbolçusu Tommi Yuryu UEFA Çempionlar Liqasının II təsnifat mərhələsində “Sabah”a qarşı keçirəcəkləri cavab oyunu öncəsi iddialı danışıb.

Prosport.Az xəbər verir ki, Kuopio klubunun yeni transferi qarşılaşmanın karyerasında xüsusi əhəmiyyət daşıdığını bildirib.

“Bu, mənim karyeramın ən vacib oyunlarından biridir. Çempionlar Liqasının III təsnifat mərhələsinə yüksəlmək üçün mübarizə aparırıq. Bunun nə qədər böyük məsələ olduğunu hər kəs başa düşür”, – deyə Yuryu bildirib.

27 yaşlı yarımmüdafiəçi Bakıda keçirilən ilk oyunda 0:1 hesabı ilə məğlub olmalarına baxmayaraq, cavab qarşılaşmasında mərhələ adlamağa inandığını söyləyib: “İlk oyunda qarşılaşdığımız tələb çox yüksək idi. Amma düşünürəm ki, evdəki cavab oyunu üçün yaxşı nəticə əldə etdik. "Sabah"a kimin üstün olduğunu göstərmək üçün meydana çıxacağıq".

Yuryu komandasının qələbə qazanmaq üçün fəal futbol nümayiş etdirməli olduğunu vurğulayıb: “İlk dəqiqələrdən təşəbbüsü ələ almalı və çox fəal olmalıyıq. Rəqibin Kuopioda müdafiəyə çəkiləcəyini düşünmürəm və bu, bizim üçün yaxşıdır. Onlar pressinqə qalxdıqda, ilk müdafiə xəttini keçmək və qol vəziyyətləri yaratmaq üçün imkanlarımız olacaq”.

KuPS-un futbolçusu doğma azarkeşlərin dəstəyinin komanda üçün böyük əhəmiyyət daşıdığını qeyd edib. O, Çempionlar Liqasının I təsnifat mərhələsində də azarkeşlərin dəstəyinin mərhələ keçmələrində mühüm rol oynadığını xatırladıb: “Ev azarkeşləri bütün mövsüm ərzində bizi möhtəşəm şəkildə dəstəkləyiblər. İnanıram ki, çərşənbə axşamı azarkeşlərin gücü ilə mərhələni keçəcəyik”.

Qeyd edək ki, KuPS – “Sabah” oyunu bu gün Bakı vaxtı ilə saat 19:00-da başlayacaq. İlk qarşılaşmada “Sabah” 1:0 hesabı ilə qalib gəlib.