“Neftçi”nin bu ilin fevralında transfer etdiyi Breno Almeyda Yuri Venidubun gözündən düşüb.

Prosport.Az sportinfo.az-a istinadən xəbər verir ki, baş məşqçi braziliyalı yarımmüdafiəçidən şikayətçidir. Ukraynalı çalışdırıcı onunla bağlı narazılığını klub rəhbərliyinə çatdırıb.

60 yaşlı mütəxəssis sağ cinah vingerini daha əsas heyətdə meydana buraxmaq istəmədiyini bildirib. Vernidub cənubi amerikalı legionerin həm Sloveniyada keçirilən məşqlərdə, həm yoxlama görüşlərində, həm də «Dinamo» ilə Konfrans Liqasının ikinci təsnifat mərhələsinin ilk matçında zəif təsir bağışladığını deyib.

Təcrübəli sükançının fikrincə, Almeyda qəsdən komandaya can yandırmır, başqa təkliflər barədə düşünür. Ona görə də braziliyalını start "11-liy"ində görməsək, təəccüblənməməliyik.

Vernidub Almeydanın işinə barmaqarası yanaşmasının komandanın digər oyunçularına da mənfi təsir göstərdiyini söyləyib.

Paytaxt təmsilçisi 27 yaşlı əcnəbi ilə 2.5 illik müqavilə bağlayıb. Sonuncu klubu "Etnikos" (Kipr) olan Almeyda Braziliya, Səudiyyə Ərəbistanı və Malta liqalarında da oynayıb.

O, 2024-cü ilin yayından çıxış etdiyi "Etnikos"un heyətində bu mövsüm 14 rəsmi oyunda meydana çıxıb, 3 qol vurub və 5 məhsuldar ötürmə müəlllifi olub.