"Sabah"ın baş məşqçisi Valdas Dambrauskas UEFA Çempionlar Liqasının 2-ci təsnifat mərhələsində Finlandiyanın "KuPS" klubuna qarşı keçiriləcək cavab oyunu öncəsi fikirlərini bölüşüb.

Prosport.Az xəbər verir ki, mütəxəssis bildirib ki, ilk görüşdə qazanılan minimal hesablı qələbə komandanı cüzi favorit saysa da, səfərdə çətin mübarizə gözləyir:

“Finlandiyada olduğumuza görə çox şadıq. İlk qarşılaşmadan sonra hesab arasındakı fərq çox azdır və düşünürəm ki, hər iki komandanın növbəti mərhələyə yüksəlmək şansı var. İlk oyundakı qələbə bizi cüzi favorit hesab etməyə imkan verə bilər. Lakin anlayırıq ki, Çempionlar Liqasında və ümumilikdə Avropa turnirlərində səfər oyunları heç vaxt asan olmur”.

Dambrauskas rəqibin yüksək motivasiya ilə meydana çıxacağını vurğulayıb:

“Onlar bütün güclərini ortaya qoyacaqlar. Biz də onların mübarizə səviyyəsinə uyğun cavab verməli, öz oyunumuzu sərgiləməli və ən yaxşı bacardığımız işi görməliyik. Komandamızın hansı səviyyədə oynaya biləcəyini yaxşı bilirik”.

Qeyd edək ki, Bakıda keçirilən ilk oyunda "Sabah" 1:0 hesabı ilə qalib gəlib.

"KuPS" – "Sabah" cavab görüşü sabah Kuopio şəhər Mərkəzi Stadionunda keçiriləcək və Bakı vaxtı ilə 19:00-da başlayacaq.