"MOİK-in Azərbaycandakı oyunu məni yaxşı mənada təəccübləndirdi. Çünki komanda yaxşı oynadı. Bundan əvvəl "Derri Siti" ilə oyun barədə şərh verməyin mənası yox idi. Çünki səma altında cəhənnəm idi".

Prosport.Az gol.bg saytına istinadən xəbər verir ki, bu sözləri Bolqarıstan futbolunun tanınmış simalarından Georgi Georgiyev deyib.

63 yaşlı veteran hücumçu sabiq komandası MOİK-in UEFA Avropa Liqasının II təsnifat mərhələsində "Qarabağ"la mübarizəsi haqda danışıb. O bildirib ki, Azərbaycan təmsilçisi deyildiyi qədər qorxulu komanda deyil və MOİK rəqibini keçə bilər: "İndi daha çətin hissə - Sofiyadakı cavab oyunu qabaqdadır. Məncə, eyni şəkildə, hətta bir az daha aqressiv oynamalıyıq. Çünki "Qarabağ"ın o qədər də möhtəşəm olmadığı aydın oldu. Onlar mediada inanılmaz dərəcədə qorxulu rəqib kimi təbliğ olunurdu. Amma qorxulu bir şey görmədim. "Qarabağ"ın 3-4 yaxşı oyunçusunu gördüm. Ümumilikdə, matç bərabər keçdi, bəzən hətta MOİK də üstünlük qazandı. Cavab oyununda qalib gəlməliyik ki, bu da uzun bir payız üçün perspektiv açacaq".

Georgiyev Sofiya təmsilçisinin mərhələ keçmək şansını də dəyərləndirib: "MOİK Azərbaycanda yaxşı oyun keçirib və Avropa Liqasının III mərhələsinə vəsiqə qazanmaq üçün yaxşı şansı var. İndi ən vacib şey budur. Sakitlik, döyüş ruhu, özünəinam – bu, əvvəlki matçlarda yox idi. Cavab oyununa eyni şəkildə yanaşmaq lazımdır.  “Qarabağ” təzyiq altında olanda çox səhv etdiyini göstərdi. Komandamız tamaşaçılardan böyük dəstək alacaq. Ümid edirəm ki, qalib gələrlər".

Qeyd edək ki, MOİK - “Qarabağ” matçı iyulun 30-da Sofiyada keçiriləcək. Komandaların Bakıdakı ilk görüşündə qolsuz heç-heçə qeydə alınıb.