"Qarabağ" Futbol Klubunun təşkilatçılığı ilə Milli Mətbuat Gününə həsr olunmuş minifutbol turniri başa çatıb.

Prosport.Az xəbər verir ki, final görüşündə "J United" komandası "İdman TV"ni 4:0 hesabı ilə məğlub edərək turnirin qalibi olub.

Üçüncü yer uğrunda keçirilən qarşılaşmada "Xəzər" komandası "CBC Sport"u 8:2 hesabı ilə üstələyib. Beşinci yer uğrunda oyunda isə "Futbol+" "Media 1875" üzərində 4:1 hesablı qələbə qazanıb.

Yarışdan sonra təşkil olunan mükafatlandırma mərasimində "Qarabağ"ın baş direktoru Emrah Çelikel media nümayəndələrini Milli Mətbuat Günü münasibətilə təbrik edib. O, artıq ikinci dəfə keçirilən turnirin ənənəvi xarakter aldığını vurğulayıb.

Qaliblərə mükafatları Emrah Çelikel, klubun mətbuat xidmətinin rəhbəri Anar Hacıyev və akademiyanın meneceri Nail Kərimov təqdim ediblər. Tədbir çərçivəsində xanım idman jurnalistləri arasında təşkil olunan xüsusi müsabiqənin qalibləri də mükafatlandırılıb.

Fərdi nominasiyalarda "J United"in üzvü Kamran Quliyev turnirin ən yaxşı oyunçusu, Murad Şirinov isə ən yaxşı qapıçısı seçilib.

Qeyd edək ki,  "Prosport"un baş redaktoru Səbuhi Musa "Futbolplas" komandasının heyətində yarışda iştirak edib.