"Barselona" rəhbərliyi bu yay Ferran Torreslə yollarını ayırmağı planlaşdırmır.

Prosport.Az xəbər verir ki, bu barədə "Mundo Deportivo" məlumat yayıb.

Mənbənin iddiasına görə, nə PSJ, nə də futbolçunun nümayəndələri tərəfindən Kataloniya klubuna rəsmi müraciət daxil olub. Bildirilir ki, Paris təmsilçisinin baş məşqçisi Luis Enrike 26 yaşlı hücumçunun transferində maraqlıdır.

Buna baxmayaraq, "Barselona"nın mövqeyi dəyişməz olaraq qalır. Klub hesab edir ki, Ferran Torres ayrılmaq istəyərsə, bu istəyini rəhbərliyə şəxsən bildirməlidir.

Hazırda məzuniyyətdə olan İspaniya millisinin hücumçusunun avqustun 10-da komandanın düşərgəsinə qoşulacağı gözlənilir. Müqaviləsi 2027-ci ilin yayına qədər qüvvədə olan futbolçu ilə yeni sözləşmə imzalanması da klubun planları sırasındadır.

Məlumata görə, maliyyə "Fair Play" qaydalarına görə müqavilənin uzadılması ilə bağlı danışıqlara transfer pəncərəsi bağlandıqdan sonra – sentyabr ayında başlanacaq. Yeni müqavilə imzalanacağı təqdirdə, "Barselona" 2022-ci il transfer razılaşmasının şərtlərinə əsasən "Mançester Siti"yə əlavə 8 milyon avro ödəyəcək.

Qeyd edək ki, Ferran Torres "Barselona"nın heyətində keçirdiyi 207 oyunda 65 qol vurub. O, ötən mövsüm 49 matçda 21 qolla klubdakı ən məhsuldar mövsümünü keçirib.