Finlandiyanın KuPS klubunun baş məşqçisi Miika Nuutinen UEFA Çempionlar Liqasının II təsnifat mərhələsində "Sabah"a qarşı keçiriləcək cavab oyunu ilə bağlı fikirlərini bölüşüb.

Prosport.Az xəbər verir ki, mütəxəssis Finlandiya çempionatında VPS üzərində 3:1 hesablı qələbədən sonra Bakıdakı ilk görüşün nəticəsini dəyərləndirib.

Miika Nuutinen bildirib ki, ilk oyundakı nəticəyə baxmayaraq, cütün taleyi hələ həll olunmayıb.

"Əlbəttə, cavab oyunu öncəsi vəziyyət Bakıdakı matçdan fərqlidir. Orada elə nəticə qazandıq ki, hələ də bu cütdə mübarizənin içindəyik. Ancaq növbəti mərhələyə yüksəlmək üçün öz oyunumuzu yaxşılaşdırmalıyıq. Bununla özümüzə mümkün olan ən yaxşı şansı yaratmalıyıq", – deyə baş məşqçi bildirib.

Qeyd edək ki, "Sabah" Bakıda keçirilən ilk görüşdə KuPS üzərində 1:0 hesablı qələbə qazanıb. Komandalar arasında cavab oyunu iyulun 28-də Kuopiodakı "Väre Arena"da keçiriləcək.