Milli Mətbuat Gününün 151-ci ildönümü münasibətilə "İmişli" PFK-nın təşəbbüsü və təşkilatçılığı ilə keçirilən "Qələmlə meydana" jurnalist müsabiqəsinə yekun vurulub.

Prosport.Az xəbər verir ki, müsabiqənin mükafatlandırılma mərasimində müxtəlif nominasiyalar üzrə qaliblər elan olunub.

Tədbirdə qaliblərə diplom və hədiyyələr təqdim edilib, media nümayəndələrinin Azərbaycan futbolunun inkişafına verdiyi töhfələr yüksək qiymətləndirilib.

"2025-2026-cı illər futbol mövsümünün yazısı" nominasiyasında Anar Xanlarov (rekord.az) 1-ci, Səxavət Qurbanov (idmanxeber.az) və Səbuhi Musa (Prosport.Az) 2-ci yerə layiq görülüb. Səbuhi Musanın Azərbaycan və Özbəkistanda keçiriləcək U-20 dünya çempionatı haqda qələmə aldığı yazı yer tutub.

"2025-2026-cı illər futbol mövsümünün süjeti/reportajı" nominasiyasında Bəhruz Musayev (frilans jurnalist) qalib olub. Xanoğlan İmanov (sportinfo.az) 2-ci, Nuray İsmayılzadə (Baku TV) isə 3-cü yeri tutub.

"2025-2026-cı illər futbol mövsümünün bloqu (vloqu)" nominasiyasında Anar Şabanoğlu (sports.az) 1-ci, Vüsal Ələkbərov (cruyffism.blog) 2-ci, Murad Şirinov (sportlife.az) isə 3-cü olub.

"2025-2026-cı illər futbol mövsümünün podkastı" nominasiyasında Emin Şəmsiyev (Baku TV) 1-ci, Emin Zeynallı (sportagon.az) 2-ci yerə layiq görülüb.

"2025-2026-cı illər futbol mövsümünün jurnalisti" nominasiyasında isə Xanoğlan İmanov (sportinfo.az) 1-ci, İlkin Sultanlı (sport1.az) 2-ci, Həsən Quluzadə (idmanxeber.az) 3-cü yeri tutub.

Sonda "İmişli" PFK rəhbərliyi müsabiqədə iştirak edən bütün jurnalistlərə təşəkkürünü bildirib, qalibləri təbrik edərək onlara gələcək fəaliyyətlərində yeni uğurlar arzulayıb.