"Mənə göstərilən böyük etimada görə Peşəkar Futbol Liqasının (PFL) üzvü olan bütün klublarımıza, bizə dəstəyini əsirgəməyən AFFA rəhbərliyinə təşəkkürümü bildirirəm".

Prosport.Az xəbər verir ki, bu sözləri növbəti 4 il müddətinə PFL prezidenti seçilən Elxan Səmədov qurumun rəsmi saytına açıqlamasında deyib.

“Çalışdığım müddətdə futbol ailəsinin, media nümayəndələrinin diqqətini, dəstəyini görmək, həmrəyliyini hiss etmək həmişə əlavə güc verib. Komandamla birlikdə əlimizdən gələnin ən yaxşısını edəcəyik ki, bizə bəslənilən bu yüksək inamı əməli fəaliyyətimizlə tam şəkildə doğruldaq. İnanıram ki, AFFA, eləcə də futbol ailəsinin hər bir üzvünün qarşılıqlı dəstəyi nəticəsində vahid məqsəd ətrafında birləşərək, ortaq səylərimizlə Azərbaycan futbolunu daha uğurlu və peşəkar səviyyəyə qaldıracağıq”, – deyə qurum rəsmisi bildirib.

Qeyd edək ki, Peşəkar Futbol Liqasının Ümumi Yığıncağında Elxan Səmədov növbəti dəfə (qarşıdakı 4 il üçün) qurumun prezidenti vəzifəsinə seçilib.