Bolqarıstanın MOİK klubu UEFA Avropa Liqasının II təsnifat mərhələsinin ilk oyununda Bakıda "Qarabağ"la qolsuz heç-heçə edib.

Prosport.Az xəbər verir ki, Sofiya təmsilçisinin baş məşqçisi Xristo Yanev matçdan sonra keçirilən mətbuat konfransında fikirlərini bölüşüb:

- Nəticəyə görə təbriklər. Cavab görüşündən nə gözləyirsiniz?

- Bizim üçün bu oyun çox vacib idi. Futbolçular özlərini çox yaxşı göstərdilər. Revanş matçında da belə davam edəcəklər. Bütün futbolçular çox motivasiyalı idilər. Onların ailələri də oyuna baxır, izləyir.

- "Qarabağ" "Slaviya"dan daha güclü rəqibdir. Niyə bu gün zəif çıxış etdiniz?

- Hər komandaya hörmətlə yanaşırıq. Hər dəfə planlaşdırdığımız kimi olmur. Sadəcə qarşımızda məqsəd var. Qarşıdakı matçı da qazanmaq istəyirik ki, mərhələ adlayaq.

- Zala daxil olarkən, bolqar jurnalistlər sizi alqışladılar, heç-heçəyə görə təbrik edirlər. "Qarabağ"la səfərdə heç-heçə sizin üçün bu qədər böyük nəticədir?

- "Qarabağ" çox güclü klubdur. Hər kəs bunu bilir. Biz də bunu başa düşürük. "Qarabağ"ın futbolçuları çox güclüdür. Buna görə də düşünürdülər ki, vəziyyət başqa cür də ola bilər. Bərabərlik bizim üçün yaxşıdır.

- Fasilədə futbolçularınıza nə dediniz?

- "Qarabağ"ın oyunçuları çox güclü oynayırdılar. Fasilədə futbolçularıma dedim ki, ehtiyatlı oynasınlar. Danışdıq ki, elə oynayaq, qol buraxmayaq. Bunların hamısını nəzərə alaraq, hücum da etdik. Amma daha çox qol buraxmamağa çalışırdıq.

- UEFA-nın cəzasına görə, Bakıdakı matçda azarkeşləriniz olmadı. Sofiyadakı görüşdə isə fanatlarınız öz yerini alacaq. Bu məqam emosional olaraq, sizə nə dərəcədə kömək edəcək?

- Azarkeşlərimiz bizə həmişə dəstəkdir. Bakıda olmasalar belə... Cavab matçında azarkeşlərin dəstəyi olacaq. Onlar bizi irəli səsləyəcək.

- Cavab görüşü haqda fikirləriniz necədir? O oyuna necə hazırlaşacaqsınız?

- Taktiki sxemdə dəyişikliklər olacaq, öz səhvlərimizi bilirik. Həmin mövqelərdə düzəlişlər ediləcək. Stadion tam dolu olacaq. Revanş oyununa çox ümidliyik. Qalib olacağımıza çox inanırıq.