Minsk "Dinamo"su avrokuboklarda Belarus futbolu adına nadir uğurlardan birinə imza atıb.

Prosport.Az football.by saytına istinadən xəbər verir ki, komanda Konfrans Liqasının II təsnifat mərhələsinin ilk oyununda Bakıda "Neftçi"ni 4:2 hesabı ilə məğlub edib. Aleksandr Şaqoykonun baş məşqçisi olduğu kollektiv görüşün 2-ci və 8-ci dəqiqələrində 2 top buraxaraq 0:2 hesabı ilə geriyə düşsə də, yekunda qələbə qazanmağı bacarıb.

Beləliklə, Minsk təmsilçisi avrokubok matçında ilk 10 dəqiqədə 2 top geri düşməsinə baxmayaraq, qalib gələn ilk Belarus klubu olub.

Buna qədər Belarusun daha üç klubu avrokuboklarda ilk 10 dəqiqədə iki qol buraxmışdı. Lakin "Dnepr" (Moqilyov) 1995-ci ildə "Kann"la 2:2 hesablı heç-heçə edib, "Minsk" 2013-cü ildə "Standard"a 1:3, BATE isə 2018-ci ildə "Çelsi"yə 1:3 hesabı ilə uduzub.