UEFA Konfrans Liqasının II təsnifat mərhələsinin ilk oyununda "Neftçi" doğma meydanda Belarusun "Dinamo" (Minsk) komandasına 2:4 hesabı ilə məğlub olub.
Prosport.Az xəbər verir ki, görüşdən sonra "Neftçi"nin kapitanı Emin Mahmudov jurnalistlərin suallarını cavablandırıb.
– Komanda 2:0 hesabda irəlidə idi. Birdən-birə nə dəyişdi? Komandaya nə oldu?
– Neçənci dəfədir ki, bizdə belə hal yaşanır. Oyuna çox yaxşı başlayırıq, amma sonra nədənsə boşalırıq, bəlkə də arxayınçılıq yaranır. Nəticədə oyunu tamamilə əldən verdik. Azarkeşlərimiz möhtəşəm idi. Stadiona gəldilər, bizi dəstəklədilər, amma biz onları məyus etdik. Buna görə onlardan üzr istəyirəm. Düşünürəm ki, bu oyunda da kifayət qədər qol epizodlarımız var idi və matçı xeyrimizə bitirə bilərdik. İnşallah, cavab oyununda vəziyyəti dəyişəcəyik.
– Sizcə, hər şeyin birdən-birə dəyişməsində arxayınçılıq rol oynadı?
– Məncə, bəli. Hesab 2:0 olandan sonra çox arxayın oynadıq. Elə bildik ki, oyun artıq həll olunub. Söz tapmaq çətindir. İndi yalnız cavab oyununa köklənməli və vəziyyəti düzəltməliyik. Hələ heç nə bitməyib.
– Cavab görüşündə istədiyiniz nəticəni qazanmaq üçün nəyi dəyişmək lazımdır?
– İlk növbədə müdafiədə daha diqqətli və konsentrasiyalı olmalıyıq. Hücumda isə yaratdığımız qol imkanlarından istifadə etməliyik. Bu gün neçə real epizodumuz oldu, amma dəyərləndirə bilmədik. Rəqib geri dönüş etdi, onları təbrik edirəm. Amma biz başımızı aşağı salmamalıyıq. Mütləq cavab oyununda vəziyyəti dəyişməliyik. Azarkeşlərimiz qarşısında borcluyuq və bunu qaytarmalıyıq.
– Komandada geridönüş üçün inam var?
– Əlbəttə, inam var. Azarkeşlər də bizə inanırlar. İndi bunu meydanda, 90 dəqiqə ərzində göstərməliyik.
– Oyundan sonra Rza ilə bağlı nə baş vermişdi? Azarkeşlərlə hansısa narazılıq yaranmışdı...
– Belə hallar olur. Oyun pis gedirdi, ona görə müəyyən xoşagəlməz anlar yaşandı. Amma artıq hər şey həll olunub, problem yoxdur.
– Müdafiədə bu qədər səhvin səbəbini nə ilə izah edərdiniz?
– Dəqiq səbəb deyə bilmərəm. Amma məncə, yenə də əsas problem 2:0-dan sonra həddindən artıq rahatlaşmağımız oldu. Oyunun bu cür dəyişəcəyini gözləmirdik və bunun da nəticəsi belə oldu.
– Əksər oyunlarda komanda 2:0 hesabı ilə önə keçəndən sonra üçüncü qolu vura bilmir və sonda ya qələbəni əldən verir, ya da məğlub olur. Sizcə, bu komandanın lənətidir?
– Bəli, problem də elə bundadır. 2:0-dan sonra üçüncü, dördüncü qolu vura bilmirik. Həmin məqamda çox rahatlaşırıq. İnşallah, bunu da düzəldəcəyik.
Bahar Rüstəm