UEFA Konfrans Liqasının II təsnifat mərhələsinin ilk oyununda "Dinamo"nun (Minsk) "Neftçi"ni 4:2 hesabı ilə məğlub edib.
Prosport.Az xəbər verir ki, matçdan sonra Belarus təmsilçisinin erməniəsilli futbolçusu Karen Vardaryan jurnalistlərin suallarını cavablandırıb.
– Yaxşı oyun oldu. 0:2 hesabından sonra geridönüş etdiniz...
– Düşünürəm ki, futbolçular xarakter göstərdilər və qələbə qazana bildilər.
– 2:0 hesabından sonra komanda sınmadı. Oyunun belə başlayacağını gözləyirdiniz?
– Əlbəttə ki, yox. Düşünürəm ki, oyuna tam köklənə bilməmişdik. Amma, şükürlər olsun ki, matçın gedişatını dəyişə bildik və hər şey istədiyimiz kimi alındı.
– Cavab oyunundan nə gözləyirsiniz? Yenə neytral meydanda oynayacaqsınız.
– Bəli, həmin meydanda keçirəcəyimiz ikinci oyun olacaq. Amma oyundan əvvəl heç kim matçın necə keçəcəyini deyə bilməz. Çalışacağıq, sona qədər mübarizə aparacağıq və ümid edirəm ki, növbəti mərhələyə yüksələcəyik.
– "Neftçi"nin də cavab oyununda nəsə etmək şansı var. Bu gün onların da kifayət qədər qol epizodu oldu...
– "Neftçi" yaxşı futbolçulara malik güclü komandadır. Əlbəttə ki, rəqibi qətiyyən kiçik hesab etməyəcəyik. Yüz faiz gücümüzlə mübarizə aparacaq və mərhələni keçməyə çalışacağıq.
– Bu oyunu avrokubok karyeranızın ən yaxşı oyunlarından biri adlandırmaq olar? Bakı yaddaşınızda məhz belə qalacaq?
– Bəli, düşünürəm ki, Bakı mənim yaddaşımda məhz belə qalacaq.
– Bu gün Bakıda qol vurmaq kimi xüsusi istəyiniz var idi?
– Xeyr, mənim Bakı ilə bağlı xüsusi prinsipiallığım yoxdur. Bu, sadəcə, Konfrans Liqasının çox vacib oyunu idi. Rəqibin "Neftçi" və ya başqa komanda olmasının mənim üçün heç bir fərqi yox idi.
– Fasilədə baş məşqçi komandaya nə dedi? Hansı tapşırıqları verdi ki, ikinci hissədə komanda tam dəyişdi və üç qol vurdu?
– Bunu baş məşqçinin özündən soruşmaq lazımdır. Mən bunu açıqlamaq istəmirəm.
– Necə düşünürsən, cavab oyununda da qol vura biləcəksən?
– Buna ümid edirəm. Əlbəttə, buna zəmanət verə bilmərəm, amma bunun üçün əlimdən gələnin ən yaxşısını edəcəyəm.
Bahar Rüstəm