"Matça hazırıq. Yaxşı oyun göstərməyə çalışacağıq".

Prosport.Az xəbər verir ki, bu sözləri Bolqarıstanın MOİK (Sofiya) klubunun baş məşqçisi Xristo Yanev UEFA Avropa Liqasının II təsnifat mərhələsində “Qarabağ”la keçiriləcək ilk oyundan əvvəl təşkil olunmuş mətbuat konfransında deyib.

Mütəxəssis bəzi futbolçuların zədə səbəbindən qarşılaşmada iştirak edə bilməyəcəyini bildirib: “Qarabağ”ın bütün oyunlarını izləmişik və rəqibi yaxşı təhlil etmişik. Güclü komandaya qarşı oynayacağımızı bilirik. Bu oyuna ciddi hazırlaşmışıq və meydanda ən yaxşı tərəflərimizi nümayiş etdirməyə çalışacağıq. Hansı komandanın daha üstün olduğunu isə sabah görəcəyik. Komandamızda ümumi vəziyyət yaxşıdır. Avropa Liqasında çıxış etmək hər bir futbolçu və məşqçi üçün böyük motivasiyadır. Bundan böyük stimul ola bilməz. Hər zaman növbəti mərhələyə yüksəlməyi arzulayırıq və bunun üçün əlimizdən gələni edəcəyik. Təbii ki, əsas məqsədimiz qələbə qazanmaqdır”.

Qeyd edək ki, iyulun 23-də Tofiq Bəhramov adına Respublika stadionunda keçiriləcək “Qarabağ” – MOİK görüşü saat 20:00-da başlayacaq.