“Neftçi”nin baş məşqçisi Yuri Vernidub Konfrans Liqasında “Dinamo”ya (Minsk) uduzduqları oyundan (2:4) sonra jurnalistlərin suallarını cavablandırıb.

Prosport.Az xəbər verir ki, mütəxəssis media nümayəndələri ilə görüşdə bunları söyləyib.

– Komanda nə üçün belə tez yoruldu?
– Cavab vermək çətindir. Hansısa komanda ilk 15-20 dəqiqə tam üstünlüyü əldə edir, iki qol vurur və yekunda məğlub olursa, bunu futbol adlandıra bilmərəm. Çoxlu fərdi səhvlər etdik və rəqib bunların sayəsində qollar vurdu.  Oyunun 20-ci dəqiqəsindən sonra vəziyyət dəyişdi. Emil Balayev zədəli oynadı və böyük ehtimal, qolu da bu səbəbdən buraxdı. İkinci hissəyə də rəqibin qolu ilə başladıq. Çoxlu səhvlər etdik, rəqibə imkan yaratdıq. Rəqib bir uzun ötürmə edir və gəlir fərqlənir. Bu necə olursa… Qol buraxandan sonra da epizodlar yarada bildik, ancaq sən vura bilmirsənsə, rəqib fərqlənir. Yekunda da penalti qolu və 2:4. Matçı təhlil etmək, nəticə çıxarmaq lazımdır. Bir daha belə səhvləri təkrarlamamalıyıq. Futbolçular haqqında danışmaq düzgün olmaz. Məğlubiyyətin ilk günahkarı mənəm.

– Mərhələni keçə bilməmək məşqçi kimi işinizə necə təsir edəcək? Yəni, avrokuboklara erkən vida istefanıza səbəb ola bilər?
– Düşünürsünüz ki, iki oyun məğlub olanda getməliyəm? Fərqli fikirləşirəm. Bu, futboldur. Birinci məğlubiyyətdən sonra kiməsə “istefa verməlisən” demirlər. Cavab oyununa ciddi hazırlaşacağıq. Sizə gülməli gələ bilər, mərhələni keçə bilərik. “Dinamo” özü I təsnifatda ilk oyunda uduzdu, cavab matçında penaltilərdə rəqibini mübarizədən kənarlaşdırdı. Bu cür sualların verilməsi doğru deyil. Dünən də qeyd etdim, sevgidən nifrətə bir yol var. Əlavə olaraq, tez-tez məşqçi dəyişikliyi klublar üçün uğurlu addım deyil.

– Hazırda burda media nümayəndələri yox, azarkeşlər olsaydı, onlara nə demək istərdiniz?
– Futboldur və belə şeylər olur. Bir komanda deyin ki, həmişə qələbə qazansın… Hamımız insanıq. Siz də işlərinizdə xətalar edirsiniz. Onda sizi də dərhal işdən çıxarmalıdırlar?

– Təzyiqlər bu oyundan sonra daha artacaq. Buna hazırsınız?
– Təzyiqə hər zaman hazıram. Güclü insanam, qorxacaq nəyimsə yoxdur, sadəcə işləmək lazımdır. Pis günləri unudub, irəli baxmaq lazımdır.

– Ardıcıl qollardan sonra yarımmüdafiədə çoxlu boşluqlar verdiniz. “8 nömrə” transferini də məhz bunun üçün istəyirsiniz?
– Bu barədə çox danışmaq olar. Əvvəlcə oyunu təhlil etməli və baxmalıyıq ki, nələr alınmadı. 20-ci dəqiqədən sonra istədiyimiz təzyiqi göstərə bilmədik. Buna görə də belə vəziyyət yarandı. Oyundan nəticə çıxartmalıyıq.