Afrika Futbol Konfederasiyası (CAF) Çempionlar Liqasında iştirak edəcək klubların sayını artırmağa hazırlaşır.

Prosport.Az xəbər verir ki, bu barədə Mərakeşin "Sport7" nəşri məlumat yayıb. Misir Futbol Federasiyasının prezidenti Hani Əbu Ridanın irəli sürdüyü təklif CAF İcraiyyə Komitəsinin üzvləri tərəfindən prinsip etibarilə dəstəklənib. Qərarın yaxın iclaslarda rəsmən təsdiqlənəcəyi gözlənilir.

Bununla əlaqədar CAF qitə kuboklarında iştirak edəcək klubların siyahısının təqdim olunması üçün son tarixi gələn aya təxirə salıb. Məqsəd yeni qaydaların təsdiqlənməsi və yarışın reqlamentinə müvafiq dəyişikliklərin edilməsidir.

Məlumata görə, dəyişiklik yalnız Afrika Çempionlar Liqasına şamil olunacaq. Afrika Konfederasiya Kubokunun formatında isə gələn mövsüm dəyişiklik nəzərdə tutulmur.

İslahat təsdiqlənərsə, Mərakeş və Misir bu qərardan ən çox faydalanan ölkələr olacaq. Belə ki, hər iki ölkə Afrika Çempionlar Liqasında əvvəlki iki komanda əvəzinə üç klubla təmsil olunacaq. Mərakeşi "Renessans Berkane", "Raca" və FUS, Misiri isə "Əl-Əhli", "Piramids" və "Zamalek" təmsil edəcək.

Konfederasiya Kubokunda isə Mərakeş əvvəlki kimi iki komanda - FAR və "Vidad"la çıxış edəcək.