Braziliya hökuməti DÇ-2026 zamanı qeydə alınan irqçilik halları ilə bağlı FİFA və BMT-yə şikayət edib

Prosport.Az xəbər verir ki, Braziliya hökuməti 2026-cı il dünya çempionatı zamanı qeydə alınan irqçilik halları ilə bağlı BMT və FİFA-ya rəsmi şikayət ünvanlayıb.

Prezident Luiz İnasiu Lula da Silvanın rəhbərlik etdiyi hökumət turnir ərzində sosial şəbəkələrdə aparılan monitorinqin nəticələrinə əsasən bu addımı atıb.

Araşdırma çərçivəsində 6 milyondan çox paylaşım təhlil edilib. Onlardan təxminən 89 mini təhqiramiz məzmun daşıyıb. Həmin paylaşımların 11 faizi isə irqçi xarakterli olub.

Braziliya hökuməti FİFA və BMT-dən bu cür halların qarşısının alınması, araşdırılması və məsul şəxslərin cəzalandırılması üçün əlavə tədbirlərin görülməsini tələb edib. Eyni zamanda, mundial zamanı baş verən irqçilik insidentlərinin nəticələrinin aradan qaldırılması istiqamətində konkret addımların atılması istənilib.