FIFA 2026-cı il dünya çempionatı zamanı tətbiq edilən və geniş müzakirələrə səbəb olan su fasilələri qaydasını yenidən nəzərdən keçirəcək.

Prosport.Az xəbər verir ki, bunu FIFA-nın qlobal futbolun inkişafı üzrə direktoru Arsen Venger mətbuat konfransında bildirib.

Turnir başlamazdan əvvəl yüksək temperatur şəraitində futbolçuların sağlamlığını qorumaq məqsədilə su fasilələrinin tətbiqi təklif olunsa da, FIFA bu qaydanın hava şəraitindən asılı olmayaraq bütün oyunlarda qüvvədə olmasına qərar vermişdi.

Bu qərar həm azarkeşlər, həm də futbol mütəxəssisləri tərəfindən tənqid olunub. Onlar örtülü stadionlarda və sərin hava şəraitində keçirilən matçlarda su fasilələrinin zəruri olmadığını bildiriblər. Bundan əlavə, televiziya kanallarının həmin fasilələr zamanı reklam yayımlaması və məşqçilərin bu vaxtdan əlavə taktiki göstərişlər vermək üçün istifadə etməsi də narazılıq doğurub.

Arsen Venger qərarın birmənalı qarşılanmadığını etiraf edib:

“Örtülü stadionlarda keçirilən bir çox oyunda insanlar bundan razı qalmadılar. Amma dünya çempionatı başlamazdan əvvəl bu qaydanın bütün matçlarda tətbiq olunmasına qərar verilmişdi. Məncə, bu, nəticələrə təsir göstərmədi. Amma biz azarkeşlər üçün çalışırıq və dünya çempionatından sonra bütün nəticələri təhlil edəcəyik”.

Qeyd edək ki, UEFA artıq Avropa çempionatı və Çempionlar Liqası kimi turnirlərdə bu cür su fasilələrinin tətbiq olunmasının planlaşdırılmadığını açıqlayıb.