Fransa millisinin baş məşqçisi Didye Deşam DÇ-2026-nın bürünc medal uğrunda İngiltərəyə 4:6 hesabı ilə uduzduqları oyundan sonra fikirlərini bölüşüb.

Prosport.Az xəbər verir ki, təcrübəli mütəxəssis məğlubiyyətə baxmayaraq, komandasının turnirdəki çıxışını yüksək qiymətləndirib:

“Uduzmaq xoş deyil. Amma görülən işdən məmnunluq hissi var. Əlbəttə, turniri üçüncü yerdə başa vurmaq daha yaxşı olardı. Böyük ambisiyalarımız var idi və çox yaxşı işlər görə bildik. İspaniya ilə matçda öz oyunumuzu göstərə bilmədik, rəqib bizə qarşı çox yaxşı çıxış etdi”.

Deşam Fransa millisinin gələcəyinə də nikbin yanaşdığını bildirib:

“Hər şey heç də pis deyil. İstedadlı komandamız var və nəticə qazanmaq üçün lazım olan hər şeyə sahib idik. Şəxsən mənim üçün bu, möhtəşəm bir səyahət idi. Möhtəşəm səkkiz həftə keçirdim”.

O, mundialı medalsız başa vurmağın məyusluq yaratdığını da gizlətməyib:

“Nəticə baxımından məyusluq var. On milyonlarla fransalıya sevinc bəxş etmək imkanımız var idi. Dünya çempionatından daha gözəl turnir yoxdur. Fransa millisinin formasını geyinməkdən daha gözəl hiss yoxdur”.

Qeyd edək ki, İngiltərə ilə qarşılaşma Didye Deşamın Fransa millisinin baş məşqçisi kimi son oyunu olub. O, 14 ildən sonra yığma ilə yollarını ayırır. Fransa isə DÇ-2014-dən sonra ilk dəfə dünya çempionatını medalsız başa vurub.