“Neftçi”nin baş məşqçisi Yuri Vernidub UEFA Konfrans Liqasının II təsnifat mərhələsində Belarusun “Dinamo” (Minsk) komandasına qarşı keçiriləcək ilk oyun öncəsi fikirlərini bölüşüb.

Prosport.Az xəbər verir ki, təcrübəli mütəxəssis komandasının daha da güclənəcəyinə inandığını bildirib:

“Əminliklə deyə bilərəm ki, komanda daha da güclənəcək. Bu gün komandanın sütunu var”.

Vernidub rəqib barədə də danışıb:

“Rəqibin ölkəsində çempionat davam edir. Düşünmürəm ki, asan oyun olacaq. Biz də bu oyuna hazırıq. Əlimizdən gələni edəcəyik”.

Baş məşqçi Sloveniyadakı təlim-məşq toplanışını uğurlu hesab etdiyini vurğulayıb:

“Təlim-məşq toplanışı çox yaxşı keçdi. İstədiyimiz yoldaşlıq görüşlərini keçirdik. Rəqiblərimiz pis deyildi. Hər zaman qələbə qazanmaq istəyirik. Amma təlim-məşq toplanışının əsas məqsədi yükləmələrdir. Toplanışdan məmnun qaldım. Ən önəmlisi isə onu zədəsiz başa vurmağımızdır”.

Vernidub transfer çalışmalarının davam etdiyini də açıqlayıb:

“Komandada 4 yeni futbolçu var. Heyəti gücləndirmək istiqamətində işlər davam edir. Konkret olaraq istədiyimiz oyunçular üzərində çalışırıq. Səhv etmək istəmirik. Hamımız birlikdə qrup mərhələsinə yüksəlmək üçün çalışırıq”.

Ukraynalı mütəxəssis sonda hansı mövqelərə futbolçu axtardıqlarını da açıqlayıb:

“Sağ cinah hücumçusu axtarılır. Hər şey yaxşı olsa, ‘8 nömrə’ mövqeyi üçün də transfer etmək istəyirik”.