FİFA-nın sabiq prezidenti Yozef Blatter 2026-cı il dünya çempionatının finalı ilə bağlı narazılığını ifadə edib.

Prosport.Az xəbər verir ki, Blatter sosial şəbəkə hesabında paylaşım edərək mundialın finalının ABŞ-ın məşhur Superboul finalına bənzədiyini bildirib:

“Su fasilələri yalnız başlanğıc idi. Bazar günü dünya çempionatının finalı bu turnirin kulminasiya nöqtəsi olacaq və orada futbol tarixinin ən uzun fasiləsi yaşanacaq. Dünya çempionatının finalı Superboulun surətinə çevrilib. Hara gedirsən, FİFA?”

Qeyd edək ki, DÇ-2026-da ilk dəfə olaraq hər hissənin ortasında üç dəqiqəlik məcburi su fasiləsi tətbiq olunub. FİFA bu addımı isti hava şəraitində futbolçuların su balansını qorumaq məqsədilə izah etsə də, fasilələrin reklam imkanlarını da artırdığı bildirilir.

Bundan əlavə, iyulun 20-nə keçən gecə Nyu-Cersidə keçiriləcək İspaniya – Argentina finalında fasilənin ənənəvi 15 dəqiqə əvəzinə 30 dəqiqəyədək uzadılacağı gözlənilir. Buna səbəb Superboul formatında hazırlanmış genişmiqyaslı şou proqramıdır.

Məlumata görə, şouda Madonna, Castin Biber, Şakira və BTS qrupunun çıxışı planlaşdırılıb.