“Azərlotereya” ASC-nin “Media Club” layihəsi çərçivəsində 22 iyul – Milli Mətbuat Günü münasibətilə idman jurnalistləri arasında “FC 26” çempionatı və futbol viktorinası təşkil olunub.

Prosport.Az xəbər verir ki, 40-a yaxın media nümayəndəsinin iştirak etdiyi proqramda öncə püşkatma mərhələsi keçirilib, daha sonra jurnalistlər “PlayStation” platformasında “FC 26” futbol çempionatında yarışıb.

Gərgin və maraqlı mübarizə şəraitində keçən çempionatda 1-ci yeri Fanat.az saytının müxbiri Kamil Xudiyev, 2-ci yeri Apasport.az saytının baş redaktoru Rasim Sultanzadə, 3-cü yeri isə Sportnet.az saytının müxbiri Həşim Məmmədov tutub.

Futbolun tarixi, dünya çempionatları, rekordlar və maraqlı faktlara dair sualların yer aldığı viktorinada Rekord.az saytının baş redaktoru Kənan Məstəliyev və Fanat.az saytının müxbiri Kamil Xudiyev qalib olub. Qaliblərə müxtəlif pul mükafatları və hədiyyələr təqdim edilib.

Tədbir şam yeməyi və futbol üzrə dünya çempionatının yarımfinal qarşılaşmasının (İngiltərə – Argentina) birgə izlənilməsi ilə davam edib.

“Azərlotereya”nın “Media Club” layihəsi çərçivəsində mütəmadi olaraq müxtəlif formatlı idman, intellektual və əyləncəli tədbirlər keçirilir. Əsas məqsəd media nümayəndələri arasında ünsiyyəti gücləndirmək, onların asudə vaxtının maraqlı və səmərəli təşkilinə töhfə verməkdir.

Tədbirdə Prosport.Az saytından Səbuhi Musa iştirak edib.