Qazaxıstanın yeniyetmələrdən ibarət millisinin üzvü Kərim Mendikanov İspaniyanın "Barselona" klubu ilə müqavilə bağlayıb.

Prosport.Az xəbər verir ki, bu barədə 15 yaşlı vinger şəxsi İnstaqram hesabında paylaşım edib.

“Ömrümün klubu ilə müqavilə imzaladığım üçün çox qürurluyam”, – deyə Mendikanov bildirib.

Gənc futbolçu "Barselona"nın "La Masia" akademiyasında çıxış edəcək. Bununla o, Kataloniya klubu ilə peşəkar müqavilə bağlayan ilk qazaxıstanlı futbolçu kimi tarixə düşüb.

Kərim Mendikanov futbola "Astana Junior" klubunda başlayıb. O, 2021-ci ildə keçirilən "Arıstan kuboku" turnirinin ən yaxşı hücumçusu seçilib.

2022-ci ildə İspaniyaya köçən futbolçu burada "Serdanyola" və "San-Kuqat" klublarının aşağı yaş qruplarında çıxış edib və uğurlu inkişafı nəticəsində "Barselona"nın diqqətini cəlb edib.