“İmişli” klubunun yeni loqosu təqdim edilib.

Prosport.Az xəbər verir ki, mərasimdə komandanın baş məşqçisi Fərid Namazov jurnalistlərin suallarını cavablandırdı:

– Komandada yeni legionerlər olacaq?
– Yaxşıdırsa, üstünlüyü yerliyə verəcəyik. Burda həm milli komanda, həm maliyyə məsələsi var. Lakin bəzi mövqelər üçün mütləq legionerlər gələcək. Ötən mövsüm heyətdə olan 6-7 legionerin də qalmağı gündəmdədir. Onlarla davam etmək istəyərəm, amma burada klubun da mövqeyi vacibdir. Özüm də futbolçu olmuşam, gənc oyunçunun nələr çəkdiyini bilirəm. Mümkün qədər çalışacağıq ki, yerlilərə üstünlük verək. Məsələn, Ayxan Süleymanlını komandamda görmək istərdim. Daha 3-4 nəfər var ki, komandada oynaya bilər. Onları gətirib, burda ehtiyatda oturtmaq istəmirəm. Müqavilə məsələlərinə görə bəzi keçidlər alınmadı.

– Bir il sonra yenidən komandaya qayıtdınız. Vaxtilə sizə inanmamışdılar, indi isə yenidən burdasınız. Sizcə, bu təyinat üzərinizdə böyük məsuliyyət yaratmayacaq?
– Ötən il Premyer Liqada işləmək istəməzdim desəm, inanmayacaqsınız. Həmin ərəfədə müqaviləmin müddəti bitmək üzrə idi və qarşılıqlı razılıq əsasında yollarımızı ayırdıq. İndi isə yenidən burdayam. Məşqçisənsə, hər zaman təzyiqləri nəzərə alıb, işə başlamalısan. Bu məsələnin müsbət tərəflərini də qeyd etmək lazımdır. Mənim üçün də bir inkişaf olacaq.

– Sizin üçün nəticə, yoxsa baxımlı futbol prioritet olacaq?
– Hücumameyilli futbol oynamaq istəyirik. Hazırlığa 10 gün əvvəl start vermişik. Bunun üzərində çalışırıq. Müəyyən planlarımız var. Transferlər də tamamlandıqdan sonra bu struktur üzrə işlərimizi görəcəyik.