"Premyer Liqaya hazırlıq dövrünün ilk mərhələsinin yekununda “Qəbələ” ilə yoxlama oyunu keçirdik. Qarşılaşmanın 1-ci hissəsində əsas heyət üzvlərinə şans verdik. Futbolçular çalışdılar, tapşırıqları yerinə yetirməyə cəhd göstərdilər və ümumilikdə pis təsir bağışlamadılar".

Prosport.Az xəbər verir ki, bu sözləri "Kəpəz"in baş məşqçisi Azər Məmmədov "Qəbələ"yə 1:2 hesabı ilə uduzduqları yoxlama oyunundan sonra deyib.

Mütəxəssis bildirib ki, qarşıda onları daha bir neçə yoxlama görüşü gözləyir: "Məqsədimiz oyundan-oyuna inkişaf etmək, çatışmazlıqları aradan qaldırmaq və komandanın oyununu daha da təkmilləşdirməkdir. Bu matç göstərdi ki, bəzi mövqelərdə güclənməyə ehtiyacımız var. Həmin mövqelərə uyğun futbolçuların transferi istiqamətində iş aparırıq. İnanıram ki, heyəti tam formalaşdırdıqdan sonra istədiyimiz komandanı quracağıq".

O, 2-ci hissədə gənc futbolçulara, akademiyanın yetirmələrinə şans verdiklərini söyləyib: "Onlardan bəziləri əsas komandanın heyətində ilk dəfə meydana çıxırdı. Təbii ki, həyəcan hiss olunurdu və bu, normaldır. Buna baxmayaraq, onlar özlərini yaxşı tərəfdən göstərməyə çalışdılar".