“Qarabağ”ın sabiq futbolçusu Sami Mmaenin yeni komandası rəsmiləşib.

Prosport.Az xəbər verir ki, o, gözlənildiyi kimi, bu dəfə həmyerlimiz Murad Məmmədovun da transfer olunduğu Kiprin “Pafos” klubuna icarəyə verilib.

Mərakeş millisinin mərkəz müdafiəçisinin müqaviləsinin maliyyə detalları da açıqlanıb. Mmae sözləşmə ilə məxsus olduğu Zaqreb “Dinamo”sunda ildə 800 min avro maaş alır. Bu məbləğ xorvatiyalılar üçün əsas problemlərdən biri olduğundan, klub oyunçunu heyətdə saxlamaq istəməyib.

Xəbərdə qeyd olunur ki, ötən mövsüm Mmae icarə əsasında “Qarabağ”da çıxış edərkən onun maaşının 70 faizini Azərbaycan klubu ödəyirdi. Lakin tərəflər arasında əldə olunan yekun razılaşmadan sonra “Pafos” 29 yaşlı oyunçunun müqaviləsində nəzərdə tutulan 800 min avroluq maaşın tamamını öz üzərinə götürüb.

Qeyd edək ki, Sami Mmaenin “Dinamo” ilə müqavilə müddəti 2027-ci ilin yayına qədərdir.